சிறுவர் துன்புறுத்தல்களைத் தடுக்கும் நோக்கில் கடுமையான சட்டங்களை தயாரிக்குமாறு ஜனாதிபதி ரணில் விக்கிரமசிங்க சட்ட திணைக்களத்துக்கு பணிப்புரை விடுத்துள்ளார்.
ஆசிரியர்கள், முதியவர்கள் மற்றும் சமூகத்தின் பல்வேறு தரப்பினரால் மேற்கொள்ளப்பட்டு வரும் சிறுவர் துன்புறுத்தல்கள் தொடர்பான பிரச்சினைக்கு தீர்வுகாண வேண்டியதன் அவசியத்தை ஜனாதிபதி விக்கிரமசிங்க வலியுறுத்தியுள்ளார்.
இத்தகைய செயல்களை திறம்பட எதிர்த்துப் போராட, குற்றவாளிகளுக்கு கடுமையான தண்டனைகளை விதிக்கும் சட்ட கட்டமைப்பை நடைமுறைப்படுத்த வேண்டியதன் அவசியத்தை ஜனாதிபதி வலியுறுத்தியுள்ளார்.
களுத்துறையில் ஹோட்டலில் இருந்து தவறி வீழ்ந்ததாகக் கூறப்படும் 16 வயது சிறுமி பரிதாபமாக உயிரிழந்தமை மற்றும் அதே பகுதியில் தனியார் நிறுவன ஆசிரியரினால் 16 சிறுவர்கள் துன்புறுத்தலுக்கு உள்படுத்தப்பட்டமை உள்ளிட்ட அண்மைய சம்பவங்களால் ஜனாதிபதி இந்த நடவடிக்கையை எடுக்கத் தூண்டியதாக ஜனாதிபதி ஊடகப் பிரிவு தெரிவித்துள்ளது.
தேசத்தின் குழந்தைகளின் நலனைப் பாதுகாப்பதற்காக பிரத்தியேகமான சட்டங்களை அறிமுகப்படுத்த வேண்டியதன் அவசியத்தை ஜனாதிபதி ரணில் விக்கிரமசிங்க குறிப்பிட்டுள்ளார்.
இதை அடைவதற்கு, நடைமுறையின் போது கவனமாக பரிசீலிக்க வேண்டியதன் முக்கியத்துவத்தை அடிக்கோடிட்டுக் காட்டும் வகையில், தற்போதுள்ள சட்டத்தில் திருத்தங்கள் செய்யப்பட வேண்டும் என்று ஜனாதிபதி அழைப்பு விடுத்துள்ளார்.
ஒரு புதிய கலந்துரையாடலைத் தொடங்குவதன் முக்கியத்துவத்தையும், குடும்பங்களுக்குள் பெற்றோர்-குழந்தை தொடர்புகள் மற்றும் மனநலம் தொடர்பான பொருளாதார மற்றும் சமூக தாக்கங்கள் குறித்து விழிப்புணர்வை ஏற்படுத்துவதன் முக்கியத்துவத்தையும் ஜனாதிபதி எடுத்துரைத்துள்ளார்.
சிறுவர் பாதுகாப்புக்காக கடுமையான சட்டங்களை நடைமுறைப்படுத்துவதுடன், அரச மற்றும் தனியார் நிறுவனங்களில் தனியான வேலைத்திட்டத்தை நடைமுறைப்படுத்துவது குறித்தும் ஜனாதிபதி ரணில் விக்கிரமசிங்க தனது கவனத்தை செலுத்தியுள்ளார்.
இத்திட்டம் குழந்தையின் மன அமைப்பைப் பற்றிய புரிதலை வளர்ப்பதையும், பரந்த கண்ணோட்டத்தைத் தழுவும் சமூகத்தை வளர்ப்பதையும் நோக்கமாகக் கொண்டுள்ளது.
சமூகத்தினுள் இவ்வாறான மனப்பான்மைகளை வளர்ப்பது பிள்ளைகளின் நல்வாழ்வுக்கு பங்களிக்கும் என ஜனாதிபதி நம்புவதாக ஜனாதிபதி ஊடகப் பிரிவின் அறிக்கையில் தெரிவிக்கப்பட்டுள்ளது.