நல்லிணக்கத்தின் ஊடாக மாத்திரம் பொருளாதாரத்தை மீட்டெடுக்க முடியாது என்று ஜனாதிபதி ரணில் விக்கிரமசிங்க தெரிவித்துள்ளார்.
பொருளாதார அபிவிருத்தியை உறுதிப்படுத்துவதற்கு மக்களின் மனப்பான்மை மற்றும் அர்ப்பணிப்பு ஆகியவற்றில் மாற்றத்தின் முக்கியத்துவத்தை ஜனாதிபதி ரணில் விக்கிரமசிங்க வலியுறுத்தியுள்ளார்.
போருக்கு முன்னர் தேசிய பொருளாதாரத்திற்கு வடமாகாணம் பெரும் பங்களிப்பை வழங்கியுள்ளதாக தெரிவித்த ஜனாதிபதி, வடக்கின் பலமான பொருளாதாரத்தை மீட்டெடுப்பதற்கு தேவையான அபிவிருத்தி வேலைத்திட்டங்கள் நடைமுறைப்படுத்தப்படும் எனவும் உறுதியளித்தார்.
வடமாகாண பிரச்சினைகள் தொடர்பில் யாழ்ப்பாணத்தில் இடம்பெற்ற கலந்துரையாடலின் போதே ஜனாதிபதி ரணில் விக்கிரமசிங்க மேற்கண்டவாறு தெரிவித்தார்.
இக்கலந்துரையாடலில் வடமாகாண அரசியல் பிரதிநிதிகள் மற்றும் கல்வியாளர்கள் குழுவொன்று கலந்துகொண்டது.
இக்கலந்துரையாடலின் போது ஜனாதிபதி ரணில் விக்கிரமசிங்க தெரிவித்த கருத்துக்கள் வருமாறு:
நல்லிணக்க வேலைத்திட்டத்தின் கீழ் அதிகபட்ச அதிகாரத்தைப் பகிர்வது மற்றும் நாட்டின் வடக்கின் அரசியல் விவகாரங்கள் தொடர்பிலும் உரையாடல்கள் இடம்பெற்றுள்ளன. பெப்ரவரி 08ஆம் திகதி நாடாளுமன்றத்தில் நான் ஆற்றிய உரையின் போது இந்த விடயம் தொடர்பில் எனது கவனத்தை கொண்டு வந்தேன். எனவே இன்று நான் அதில் கவனம் செலுத்தப் போவதில்லை.
நாட்டின் பொருளாதார அபிவிருத்தி வேலைத்திட்டத்திற்கு இணையாக வடமாகாணத்தில் பெரும் அபிவிருத்தி ஒன்று இடம்பெற வேண்டும் என நான் நம்புகிறேன். போரினால் யாழ்ப்பாணத்தின் பொருளாதாரம் முற்றாக வீழ்ச்சியடைந்துள்ளது. பொருளாதார வளர்ச்சியில் எதிர்பார்த்த அளவை இன்னும் எட்டவில்லை. எனவே, நாட்டை அந்த நிலைக்குக் கொண்டு வர 10 வருடத் திட்டத்தின் கீழ் செயல்படுவோம் என நம்புகிறோம்.
எனவே இந்த முடிவை நனவாக்க வெளிநாட்டு உதவிகள் மட்டுமன்றி புலம்பெயர் நாடுகளின் உதவிகளையும் நாம் பெற வேண்டும்.
எனவே, அந்த அபிவிருத்தித் திட்டம் குறித்த உங்கள் கருத்துக்களைப் பெறுவதற்கும் அபிவிருத்தி உந்துதலுக்கான உங்கள் கருத்துக்களைப் பெறுவதற்கும் இதை ஒரு வாய்ப்பாக ஆக்குகிறேன். எனவே இந்த மாகாணத்தில் ஒரு புதிய பொருளாதார அபிவிருத்தியை உருவாக்குவதற்கு உங்களின் கருத்துக்களை எங்களுடன் பகிர்ந்து கொள்ளுமாறு உங்களை அழைக்க விரும்புகிறேன்.
உரம் வழங்கும் திட்டத்தில், நெல் விளைசலுக்கு மட்டுமே உரம் வழங்குவது குறித்து கவனம் செலுத்தப்பட்டது. எதிர்காலத்தில் ஏனைய பயிர்களுக்கும் உரங்களை வழங்க நடவடிக்கை எடுப்போம்.
கலந்துரையாடலில் கலந்துகொண்ட பெரும்பாலானோர் தீர்க்கப்பட வேண்டிய பிரச்சினைகள் குறித்துப் பேசினர். குறுகிய காலத்தில் தீர்க்கப்படக்கூடிய பல பிரச்சினைகள் உள்ளன. நாட்டில் தற்போது நிலவும் நெருக்கடியான சூழ்நிலை காரணமாக இந்த வருடத்தில் அவற்றுக்கான தீர்வுகளை வழங்குவது கடினமாக இருந்தாலும், எதிர்காலத்தில் அவை தொடர்பில் கவனம் செலுத்துவோம்.
இந்தப் பகுதியில் அரசு சாரா பல்கலைக்கழகத்தை நிறுவும் திட்டம் உள்ளது.
இப்பகுதிக்கு தொழில்நுட்ப நிறுவனங்களை கொண்டு வருவதன் மூலம், அறிவு கிடைக்கும் தொழில்நுட்ப பகுதியாக இதை மாற்ற முடியும். மேலும் பூநகரியை புதிய நகரமாக மாற்றுவதே எங்கள் திட்டம். இந்த அனைத்து செயற்பாடுகளுடனும் எனது எதிர்பார்ப்பு வடக்கின் அபிவிருத்தியை விரைவுபடுத்த வேண்டும் என்பதே.
அத்துடன் வடமாகாணத்தின் அபிவிருத்தியை கடுமையாகப் பாதிக்கும் திருகோணமலை துறைமுக அபிவிருத்தி நடவடிக்கைகளை இந்தியாவின் உதவியுடன் நடைமுறைப்படுத்த வேண்டும். போருக்கு முன்னர், நாட்டின் பொருளாதாரத்திற்கு வட மாகாணம் பரந்த பங்களிப்பை வழங்கியது. அரசு என்ற வகையில், அந்த நிலமையை மீட்டெடுத்து விரைவாக உயர்த்துவோம் என்று நம்புகிறோம்.
நல்லிணக்கத்தினால் மட்டும் இந்தப் பிரச்சினைகளுக்கு தீர்வு கிடைக்காது. நாட்டில் வறுமை ஒழிக்கப்பட்டு இளைஞர்களுக்கு சிறந்த எதிர்காலம் உருவாக்கப்பட வேண்டும். இல்லையெனில் இந்தப் பிரச்னைக்கு நிரந்தரத் தீர்வு கிடைக்காது.
அத்துடன், போதைப்பொருள் பிரச்சினையை இந்த மாகாணத்தில் இருந்து அகற்ற வேண்டும். அடிமட்ட மட்டத்தில் அந்தத் திட்டங்களைச் செயல்படுத்துவது குறித்து அனைவரும் இணைந்து விவாதிக்க வேண்டும் என்று நான் விரும்புகிறேன்.
இதை ஒரு அரசினால் மட்டும் நிறைவேற்ற முடியாது. நாங்கள் ஆதரவை வழங்குவோம், அதன்படி நீங்கள் அனைவரும் அர்ப்பணிப்புடன் இணைந்து பணியாற்றுமாறு கேட்டுக்கொள்கிறேன்.
ஒவ்வொரு மாகாணமும் தத்தமது மாகாணத்தின் அபிவிருத்திக்கு பொறுப்பேற்க வேண்டும். 09 மாகாணங்களுக்கு இடையில் ஒரு போட்டியை நடத்துவோம். அது இறுதியாக நாட்டை அபிவிருத்தி செய்யும். – என்றார்.